Ne sit ancillae tibi amor pudori,
Xanthia Phoceu: prius insolentem
Serua Briseis niueo colore
Mouit Achillem,
5
Mouit Aiacem Telamone natum
Forma captiuae dominum Tecmessae,
Arsit Atrides medio in triumpho
Virgine rapta,
Barbarae postquam cecidere turmae
10
Thessalo uictore et ademptus Hector
Tradidit fessis leuiora tolli
Pergama Grais.
Nescias an te generum beati
Phyllidis flauae decorent parentes;
15
Regium certe genus et penatis
Maeret iniquos.
Crede non illam tibi de scelesta
Plebe dilectam neque sic fidelem,
Sic lucro auersam potuisse nasci
20
Matre pudenda.
Bracchia et uoltum teretesque suras
Integer laudo - fuge suspicari -
Cuius octauum trepidauit aetas
Claudere lustrum.