Poscimus, si quid uacui sub umbra
Lusimus tecum, quod et hunc in annum
Viuat et pluris, age dic Latinum,
Barbite, carmen,
5
Lesbio primum modulate ciui,
Qui ferox bello tamen inter arma,
Siue iactatam religarat udo
Litore nauim,
Liberum et Musas Veneremque et illi
10
Semper haerentem puerum canebat
Et Lycum nigris oculis nigroque
Crine decorum.
O decus Phoebi et dapibus supremi
Grata testudo Iouis, o laborum
15
Dulce lenimen mihi cumque salue
Rite uocanti.