Musis amicus tristitiam et metus
Tradam proteruis in mare Creticum
Portare uentis, quis sub Arcto
Rex gelidae metuatur orae,
5
Quid Tiridaten terreat, unice
Securus. o quae fontibus integris
Gaudes, apricos necte flores,
Necte meo Lamiae coronam,
Piplei dulcis. nil sine te mei
10
Prosunt honores: hunc fidibus nouis,
Hunc Lesbio sacrare plectro
Teque tuasque decet sorores.