Quis desiderio sit pudor aut modus
Tam cari capitis? praecipe lugubris
Cantus, Melpomene, cui liquidam pater
Vocem cum cithara dedit.
5
Ergo Quintilium perpetuus sopor
Vrget; cui Pudor et Iustitiae soror
Incorrupta Fides nudaque Veritas
Quando ullum inueniet parem?
Multis ille bonis flebilis occidit,
10
Nulli flebilior quam tibi, Vergili.
Tu frustra pius, heu, non ita creditum
Poscis Quintilium deos.
Quid? si Threicio blandius Orpheo
Auditam moderere arboribus fidem,
15
Num uanae redeat sanguis imagini,
Quam uirga semel horrida
Non lenis precibus fata recludere
Nigro conpulerit Mercurius gregi?
Durum: sed leuius fit patientia
20
Quidquid corrigere est nefas.