Velox amoenum saepe Lucretilem
Mutat Lycaeo Faunus et igneam
Defendit aestatem capellis
Vsque meis pluuiosque uentos.
5
Inpune tutum per nemus arbutos
Quaerunt latentis et thyma deuiae
Olentis uxores mariti
Nec uiridis metuunt colubras
Nec Martialis haediliae lupos,
10
Vtcumque dulci, Tyndari, fistula
Valles et Vsticae cubantis
Leuia personuere saxa.
Di me tuentur, dis pietas mea
Et musa cordi est. hic tibi copia
15
Manabit ad plenum benigno
Ruris honorum opulenta cornu.
Hic in reducta ualle caniculae
Vitabis aestus et fide Teia
Dices laborantis in uno
20
Penelopen uitreamque Circen.
Hic innocentis pocula Lesbii
Duces sub umbra, nec Semeleius
Cum Marte confundet Thyoneus
Proelia, nec metues proteruum
25
Suspecta Cyrum, ne male dispari
Incontinentis iniciat manus
Et scindat haerentem coronam
Crinibus inmeritamque uestem.