Ibis Liburnis inter alta nauium,
Amice, propugnacula,
Paratus omne Caesaris periculum
Subire, Maecenas, tuo:
5
Quid nos, quibus te uita si superstite,
Iucunda, si contra, grauis?
Vtrumne iussi persequemur otium
Non dulce, ni tecum simul,
An hunc laborem, mente laturi decet
10
Qua ferre non mollis uiros?
Feremus et te uel per Alpium iuga
Inhospitalem et Caucasum
Vel occidentis usque ad ultimum sinum
Forti sequemur pectore.
15
Roges, tuum labore quid iuuem meo
Inbellis ac firmus parum?
Comes minore sum futurus in metu,
Qui maior absentis habet,
Vt adsidens inplumibus pullis auis
20
Serpentium adlapsus timet,
Magis relictis, non, ut adsit, auxili
Latura plus praesentibus.
Libenter hoc et omne militabitur
Bellum, in tuae spem gratiae,
25
Non ut iuuencis inligata pluribus
Aratra nitantur meis
Pecusue Calabris ante sidus feruidum
Lucana mutet pascuis
Neque ut superni uilla candens Tusculi
30
Circaea tangat moenia.
Satis superque me benignitas tua
Ditauit, haud parauero
Quod aut auarus ut Chremes terra premam,
Discinctus aut perdam nepos.
15
labore ς Glareanus
laborem Ω