Acmen Septimius suos amores
Tenens in gremio "Mea" inquit "Acme,
Ni te perdite amo atque amare porro
Omnes sum assidue paratus annos
5
Quantum qui pote plurimum perire,
Solus in Libya Indiaque tosta
Caesio ueniam obuius leoni."
Hoc ut dixit, Amor sinistra ut ante
Dextra sternuit approbationem.
10
At Acme leuiter caput reflectens
Et dulcis pueri ebrios ocellos
Illo purpureo ore sauiata,
"Sic" inquit "mea uita Septimille,
Huic uni domino usque seruiamus,
15
Vt multo mihi maior acriorque
Ignis mollibus ardet in medullis."
Hoc ut dixit, Amor sinistra ut ante
Dextra sternuit approbationem.
Nunc ab auspicio bono profecti,
20
Mutuis animis amant amantur.
Vnam Septimius misellus Acmen
Mauult quam Syrias Britanniasque;
Vno in Septimio fidelis Acme
Facit delicias libidinisque.
25
Quis ullos homines beatiores
Vidit, quis uenerem auspicatiorem?