Catullus carmina 15

Testo base di riferimento: W. Eisenhut, 1983

Cura dell'edizione digitale: G. Maggiali, I. Turrini, 2009

Altre sezioni


Commendo tibi me ac meos amores,

Aureli: ueniam peto pudentem,

Vt, si quicquam animo tuo cupisti,

Quod castum expeteres et integellum,

5

Conserues puerum mihi pudice,

Non dico a populo (nihil ueremur

Istos, qui in platea modo huc modo illuc

In re praetereunt sua occupati),

Verum a te metuo tuoque pene

10

Infesto pueris bonis malisque.

Quem tu qua lubet, ut lubet, moueto,

Quantum uis, ubi erit foris paratum:

Hunc unum excipio, ut puto, pudenter.

Quodsi te mala mens furorque uecors

15

In tantam impulerit, sceleste, culpam,

Vt nostrum insidiis caput lacessas:

A, tum te miserum malique fati,

Quem attractis pedibus patente porta

Percurrent raphanique mugilesque!

13

pudenter R M G²

prudenter G¹ R² M²