Cui dono lepidum nouum libellum
Arida modo pumice expolitum?
Corneli, tibi: namque tu solebas
Meas esse aliquid putare nugas,
5
Iam tum, cum ausus es unus Italorum
Omne aeuum tribus explicare cartis,
Doctis, Iuppiter, et laboriosis.
Quare habe tibi, quicquid hoc libelli,
Qualecumque; quod, o patrona uirgo,
10
Plus uno maneat perenne saeclo.
1
v. 1: Auson. praef. 4,1 Green; vv. 1-2: Isid. orig. 6,12,3; Mar. Victorin. gramm. 6,148 K.; vv. 1-4: Bass. gramm. 6,261 K.; Ter. Maur. 2562-2564; Fortun. gramm. 6,298 K.; v. 2: Seru. Aen. 12,587; vv. 3-4: Plin. nat. praef. 1.