Vere nouo florebat humus, satus aethere sudo

Imbre maritatum uegetabat spiritus orbem.

Ipsa quoque aetherea deducta propagine flamma

Visceribus suffusa cauis noua germina largo

5

Vrgebat gremio reparans elementa calore.

Latonae geminum numen, Cythereius ignis,

Iuppiter ipse parens et Maiae mobile pignus

Temperie unanimi, secluso frigore tristi

Saturni ueteris, mundi per aperta nitebant:

10

Cum Venus Idaliis comitata sororibus exit,

Thessalicos uisura Lares, ubi florida Tempe

Perpetuis faciles conseruant cultibus hortos.

It Natura comes lactenti feta papilla,

Vnde uenit uitale decus; prope Gratia blando

15

Intuitu inuergit florem nascentibus herbis.

Ante deam tenui decurrit ueste Voluptas,

Ostentans reuocansque nitentia membra tegendo,

Purpureas croceo suras euincta cothurno,

Speque sua maior nullaque imitanda figura.

20

Blanda manu implexam tenet hanc ducitque canendo

Aethereas Siren iterabile carmen ad auras.

Ad iuga blanda sedet niueas moderata columbas,

Non satianda bonis, diuae soror alma. Cupido

Aliger obsequio stipat puer; agmen Amorum

25

Claudit agens choreas pictis exercitus armis.

Arrident late toto reuolantia mundo

Sidera, blanditu dominam uenerata sereno.

Ipsa leui residens curru, mitissima diuum,

Ventilat afflatu caelum Zephyrisque remissis

30

Mulcet agros lenique astris adremigat aura.

Protinus ut liquidum Phoebi iubar ore recussit

Progressamque deam docuere elementa fauendo,

Lydia qui cedente reliquerat arua sorore,

Obuia pampineis Liber rapit agmina thyrsis.

35

Ditia Pactoli superat Peneius amnis

Munera, clarus aquis nitidum stagnantibus aurum.

Exsultant Dryadum faciles deliria Fauni

Et Satyri, sub utroque deo promptissima pubes.

Corniger hos stimulis implet puer, aethera clangor

40

Verberat et crotalis responsant tympana pulsu.

Ecce pater pando recubans Silenus asello,

Cui lacer a summo pendebat cantharus armo

(Vina per os hirtaeque fluunt compendia barbae),

E numero comitum Veneris uestigat et olim

45

Captus amore petit festino Chlorida uoto.

Nympha retro cedens dum spes alit inque furentem

Blanda micans oculis refugit pede, libera lusu

Turba fauet totoque fremit petulantia coetu.

Hic subito uolitans sparsas rumore per umbras

50

Fama mouet mentes incertaque murmura portat.

Orta dehinc largo narratur fabula motu;

Non uidet auctorem, sed sentit quisque refertque

Atque audisse putat, nec primus in agmine toto est:

Mane sub Eoo, dum diuae castra mouentur,

55

Elapsum pennis et inobseruata ferentem

Per liquidas Hymenaeum auras uestigia Romae

Aduertisse pedem subitoque redire tumultu.

Ipse aderat pompamque trahens uictosque iugali

Quos inconsulta coniunxerat arte Diona,

60

Auspicium iuuenem atque aequaeuae pectus Aellae.

Illos prima patrum generosae stirpis alumnos

Nobilitas tota pridem celebrauerat urbe

Et species morumque opulentia compta nitore;

Nec semel Arcitenens tentarat spicula castis

65

Indere pectoribus, matris molimine magno.

Olli florebant studiis Helicone potito,

Nec chorus Aonidum nec sanctae Palladis ardor

Nec pater ipse iugi cuiquam maiore fauebat

Ingenio. par cura animo, labor otia nescit

70

Improbus atque altis urit praecordia flammis.

Gloria, ab excelsa Laus intemerabilis arce

Monstrat iter, quo celsa petunt fastigia rerum

Semideae mentes, puro stirps prosata caelo.

At teneros aeui nec adhuc puerile sonantes

75

A primis fausto sociarant omine cunis

Solliciti longa de posteritate parentes,

Hinc puer elusa iuga Calliopeius illis

Nexuerat domina laetamque ferebat ad aulam

Luctantes rapiens iuuenes, immane tropaeum.

80

Indignata tamen risit dea; nec tibi tantum

Saepe licere uelis, nimium studiose pudoris,

Maternos nimium, puer, amplexate rigores.

Protinus instaurant pompae genialis honorem

Deflectuntque uiam pelagoque aduertere certant.

85

Ales at e medio reuolans Concordia coetu

Iungere nunc dextras, nunc oscula pangere mandat

Primaque perpetuis mysteria tradere curis.

Ipsa pharetratos urget dea Pronuba fratres,

Sancta Fides, flectant choreas ad moenia Romae

90

Et patrios laeto repetant rumore Penates,

Vnde ante ora suorum et auitae in sedibus aulae

Testentur fixum foedus thalamumque coronent,

...