anthologia Latina 879

Altre sezioni


Angelus alloquitur Mariam, quo praescia uerbo

      Concipiat salua uirginitate deum.

Dant tibi Chaldaei praenuntia munera reges:

      Myrrham homo, rex aurum, suscipe tura deus.

5

Permutat lymphas in uina liquentia Christus,

      Quo primum facto se probat esse deum.

Quinque explent panes, pisces duo milia quinque,

      Et deus ex paruo plus superesse iubet.

Editus ex utero caecus noua lumina sentit

10

      Et stupet ignotum se meruisse diem.

Lazarus e tumulo Christo inclamante resurgit

      Et durae mortis lex resoluta perit.

Nutantem quatit unda Petrum, cui Christus in alto

      Et dextra gressus firmat et ore fidem.

15

Exsanguis Christi contingit femina uestem.

      Stat cruor in uenis. fit medicina fides.

Iussus post multos graditur paralyticus annos,

      (Mirandum) lecti portitor ipse sui.