Parce puer, si forte tuas sonus improbus aures
Aduenit infandumque audens exposcere munus.
Nam meminisse potes, seruata lege pudicos
Esse aliquos longumque diu tenuisse pudorem,
5
Sed postquam aurata delegit cuspide telum
Caecus amor tenuique offendit uulnere pectus,
Tum pudor et sacri reuerentia pectoris omnem
Labitur in noxam: dolet heu sic uelle, stupetque
Flammigeros motus, et tandem cogitur ipsi
10
Succubuisse deo et genua inclinasse tyranno.
Quare age, care puer, cuius modo forma decorque
Ingeniumque ferax omni probitate sacroque
Pieridum cultu renitens et Palladis arte
Vexant peruigili semper mea pectora flamma:
15
Da precor auxilium atque ignem lenito furentem!