Ales dum madidis grauata pennis
Vdos tardius explicat uolatus,
Defecta in medio repente nisu
Capta est pondere deprimente plumae:
5
Cassato solito uigore pennae,
Quae uitam dederant, dedere letum.
Sic, quis ardua nunc tenebat alis,
Isdem protinus incidit ruinae.
Quid sublimia circuisse prodest?
10
Qui celsi steterant, iacent sub imis!
Exemplum capiant nimis tenendum;
Qui uentis tumidi uolant secundis.