anthologia Latina 806

Altre sezioni


Proponit primus liber, inuehit, inuocat atque

Exponit causas, cursus properantis ad urbem

Caesaris et nimios hic narrat in urbe timores.

Quadruplices questus libri pars prima secundi

5

Continet; eiusdem pars proxima uerba Catonis

Et Bruti. dicit, quo foedere Martia nupsit.

Hostis in occursum ducit pars tertia; Magnum

Opposuisse manus notat et quod Caesaris ira

Cuncta ruunt. arcesque capit, cedentibus instat.

10

Ast uni uitam tribuit qui nuntius hosti,

Exemplumque fuit; quo uiso Magnus ad omnes

Turmas ipse suas hortandas magna minatur.

Hinc pars quarta notat Pompeium tunc properasse

Brundusium; tandemque uidens maris ostia claudi

15

Hesperiam puppesque duas in parte reliquit.

Tertius exponit primo quid Iulia dixit,

Quid Magnus fecit, audax quo Curio missus.

Altera pars libri dicit, quod Caesar in urbem

Iuit opesque dedit Romae nolente Metello

20

Militibus, Magnique notat qui signa sequuntur.

Vltima quod tendens Hispanas Caesar ad oras

Massiliae stetit: hanc sed uicit in aequore Brutus.

At quarti libri narrat pars prima, quod iuit

Caesar in Hispanos ad iussa ducesque reuersos.

25

Mortem Vultei cum multis altera pars dat.

Vltima, quod Varum pepulit campoque fugauit

Curio, fraude Iubae cecidit qui strage suorum.

In prima quinti Pompeio Roma regenda

Est data. multa timens pro se responsa recepit

30

Appius; exponit pars proxima seditionem

Sedatam poena. mare transiit urbe relicta

Caesar, qui questus, quod non Antonius ultra

Iuerat, expertus fuit ipse pericula ponti.

Vltima, quod posita mansit Cornelia Lesbo.

35

"Postquam castra" notat, quod Caesar uictus ab hoste

Fugit in Emathiam, quamuis clausisset is ipsum.

Hinc et Thessaliam quae sit gentemque profanam

Describit. damnat Sextum non digna petentem.

"Segnior Oceano" casu quo bella geruntur

40

Ostendit primo, sic et quae dixit uterque.

Proxima pars bellum describit, et ultima, Magnum

Deuictum cepisse fugam. Sed Caesar habendas

Militibus monstrauit opes castrisque recedit.

"Iam super Herculeas" quo fugit, denotat atque

45

Quid dixit Magnus .. quando quaerere Parthos

Consuluit: sed cassa fuit sententia Magni.

Parsque secunda notat Pompeium morte peremptum

Indigna; Phariis pars ultima datque sepulcrum.

"At non in Pharia" dicit, quod bella Catoni

50

Libertate placent, qui Sextum multa minantem

Corripuit, postquam sciuit de funere Magni.

Altera pars multos correptos uoce Catonis

Dicit per Syrtes fore multa pericula passos.

Tertia quod Caesar simulauit ferre dolorem

55

Nec doluit saeuus generi ceruice recisa.

"Vt primum" primo notat ut perrexit ad urbem

Aegypti Caesar et ut est Cleopatra locuta.

Et dapibus sumptis Nili disquiritur ortus.

Parsque secunda refert famulos qui fata parabant

60

Praua duci caesos aduersa nefandaque passos.