Est ubi non imber nec ros dilabitur umquam,

      Est ubi nec nix est nec glacialis hiems,

Est sine uite solum, quaedam <est> sine matre propago.

      Est sine rege tribus, est sine naue fretum.

5

Non sine mors gemitu, non partus absque dolore,

      Non nix absque gelu, non notus absque sono.

Absque calore focus non est nec amore puella,

      Non sine carne pilus, non sine pelle caro,

Non sine matre puer, non est sine uite Lyaeus,

10

      Non sine pisce lacus, non sine sorde palus,

Non sine laude pius, non est sine crimine latro,

      Non sine fraude forum, non sine mure penus.

Non urbs absque malo, non scortis absque lupanar,

      Non sine uoce sonus, non sine luce dies.

15

Dulce sopor fessis et terris flumina siccis,

      Dulce patri proles diuitibusque gaza

Tela uiro decus est peplumque columque puellis.

      Laus sine lite domus, laus sine fure locus.

Scire aliquid laus est, et nil nescire uerendum:

20

      Nam sine doctrina quid nisi turpis homo?

Visus, auditus, tactus, olfactus, hiatus:

      Vnum quinque duces sub uice corpus alit.

Dant oculi lacrimas, auditus concipit auris,

      Cor dolet, os loquitur, nasus odore sapit.

25

Armeniae tigres, Libyae fert terra leones,

      Est elefas Indis, tura Sabaeus habet.

Grifes hyperboreae septem subiecta trioni

      Genti non absunt, aemula pestis edax.