anthologia Latina 786a

Altre sezioni


Inter praecipuas quas cingunt aequora terras

      Nil simile in mundo est, sancte Lerine, tibi.

Optima quae uiuo fundata est insula saxo

      Et super ornato tegmine plana uiret.

5

Diues multiplici laetatur silua colore;

      Arboribus mixtis fert coronata comas.

Per nemus umbrosum uentorum flamina uitat

      Et portum sanctis praeparat illa uiris.

Vt caret haec numquam foliis nec tempora mutat,

10

      Sic meritis semper pectora uiua tenet

Prisca rediuiuo quo constat regula cultu,

      Quo grex agnorum non timet ora lupi.

Culmine Honoratus meritis et nomine dictus

      Floruit hic primus incola, Christe, tuus.

15

Postquam sancta uiri perrexit fama per orbem,

      Vix alium meruit diues habere patrem.

Hic nouus antiquum iecit ad leta draconem,

      Nec post hic rabidus horrida fauce nocet.

Quod si uel casu ueniat in litore serpens,

20

      Viuere non ultra noxius ore potest.

Iustorum hoc opus est, ut nostri funeris auctor

      Pellatur uictus, uita iubente mori.

Sic electa deo praecellit insula saeclo,

      Quae tot perfectis gaudet amoena uiris.

25

Temnere mundanas optat qui mente procellas,

      Inuenit hic ualuas iam, paradise, tuas.