Fulgens Eunomia decensque uirgo,
Pollens nobilis et fecunda libris
Et totum uenerabilis per orbem
Atque in culmine constituta celso,
5
Subter cuncta uidens, beata clemens
Mitis blanda grauis quieta uiuis.
Sic es Christo parens talisque, priscis
Qualis rustica Veritas capillis.
Augustum caput atque consecratum
10
Constans erigis et promittis omnes
Castam uiuere te deo per annos.
Adsit cuncta regens pater uolenti;
Dextram filius ille Nazarenus
Succurrens tibi tradat imploranti;
15
Sanctus spiritus influens medullis
Sensus inriget et fomenta donet,
Gressus dirigat et uiam procuret,
Confirmet pedes et fidem propaget,
Enses proterat et dolos latentes
20
Prodat magnificus protector, et te
Annis praegrauem et corona laetam
Sanctam collocet angelus in urbem.
Hic te perpetua quiete donet.
Tunc quaeso meminisse te clientis,
25
Cum Christum fide uideris serena.