anthologia Latina 726

Altre sezioni


Quid tacitus Mystes? Curae mea gaudia turbant,

Cura dapes sequitur, magis inter pocula surgit

Et grauis anxietas laetis incumbere gaudet

Non satis accipio. Nec me iuuat omnia fari.

5

Forsitan imposuit pecori lupus? Haud timet hostes

Turba canum uigilans. Vigiles quoque somnus obumbrat.

Altius est, Glycerane, aliquid, non hoc, pater; erras.

Atquin turbari sine uentis non solet aequor.

Quod minime reris, satias mea gaudia uexat.

10

Deliciae somnusque solent adamare querellas.

Ergo si causas curarum scire laboras -

Quae spargit ramos, tremula nos uestiet umbra

Vlmus, et in tenero corpus submittere prato

Herba iubet: tu dic, quae sit tibi causa tacendi.

15

Cernis ut adtrito diffusus caespite pagus

Annua uota ferat sollemnisque imbuat aras?

Spirant templa mero, resonant caua tympana palmis,

Maenalides teneras ducunt per sacra choreas,

Tibia laeta canit, pendet sacer hircus ab ulmo

20

Et iam nudatis ceruicibus exuit exta.

Ergo non dubio pugnant discrimine nati:

Et negat huic aeuo stolidum pecus aurea regna?

Saturni rediere dies Astraeaque uirgo,

Totaque in antiquos redierunt saecula mores.

25

Condit securus tuta spe messor aristas,

Languescit senio Bacchus, pecus errat in herba.

Nec gladio metimus nec clausis oppida muris

Bella tacenda parant, nullo iam noxia partu

Femina quaecumque est hostem parit. arua iuuentus

30

Nuda fodit tardoque puer domifactus aratro

Miratur patriis pendentem sedibus ensem

Sed procul a nobis infelix gloria Sullae

Trinaque tempestas, moriens cum Roma supremas

Desperauit <opes> et Martia uendidit arma

35

Nunc tellus inculta nouos parit ubere fetus,

Nunc ratibus tutis fera non irascitur unda,

Mordent frena tigres, subeunt iuga saeua leones.

Casta faue Lucina, tuus iam regnat Apollo!