Tethya marmoreo fecundam pandere ponto
Et salis aequoreas spirantis mole cateruas,
Quaeque sub aestifluis Thetis umida continet antris,
Coeptantem, Venus alma, foue, quae semine caeli
5
Parturiente salo diuini germinis aestu,
Spumea purpureis dum sanguinat unda profundis,
Nasceris e pelago, placido dea prosata mundo.
Nam cum prima foret rebus natura creandis
In foedus conexa suum, ne staret inerti
10
Machina mole uacans, tibi primum candidus aether
Astrigeram faciem nitido gemmauit Olympo.
Te fecunda sinu Tellus amplexa resedit
Ponderibus librata suis, elementaque iussa
Aethereas seruare uices. tu fetibus auges
15
Cuncta suis: totus pariter tibi parturit orbis.
Quare, diua, precor, quoniam tua munera paruo
Ausus calle sequor, uitreo de gurgite uultus
Dextera prome pios et numine laeta sereno
Pierias age pande uias. da Nerea molli
20
Placatum gaudere freto uotisque litata
Fac saltem primas pelagi libemus harenas.
Vos quoque, qui resono colitis caua Tempea coetu...
...