Amare liceat, si potiri non licet.
Fruantur alii: non moror, non sum inuidus;
Nam sese excruciat, qui beatis inuidet.
Quos Venus amauit, facit amoris compotes:
5
Nobis Cupido uelle dat, posse abnegat.
Olli purpurea delibantes oscula
Clemente morsu rosea labia uellicent,
Candentes dentes effigient suauio,
Malas odorent ore et ingenuas genas
10
Et pupularum nitidas geminas gemmulas.
Quin et cum tenera membra molli lectulo
Compactiora adhaerent Veneris glutino,
Libido cum lasciuo instinctu suscitet
Sinuare ad ueneris usum femina feminae
15
Inter gannitus et subantis uoculas,
Carpant papillas atque amplexus intiment
Arentque sulcos molles aruo Venerio,
Thyrsumque pangant hortulo Cupidinis
Dent crebros ictus coniuente lumine
20
Trepidante cursu uenae et anima fessula
Eiaculent tepidum rorem niueis laticibus.
Haec illi faciant, queis Venus non inuidet;
At nobis casso saltem delectamine
Amare liceat, si potiri non licet!