Ergone supremis potuit uox inproba uerbis
Tam dirum mandare nefas? ergo ibit in ignes
Magnaque doctiloqui morietur Musa Maronis?
A scelus indignum! soluetur littera diues
5
Et poterunt spectare oculi, nec parcere honori
Flamma suo? †ductumque operi seruabit amorem?
Pulcher Apollo, ueta! Musae prohibete Latinae!
Liber et alma Ceres, succurrite! uester in armis
Miles erat, uester docilis per rura colonus.
10
Nam docuit, quid uer ageret, quid cogeret aestas,
Quid pater autumnus, quid bruma nouissima ferret.
Munera telluris larga ratione notauit,
Arbuta formauit, sociauit uitibus ulmos,
Curauit pecudes, apibus sua castra dicauit.
15
Illum, illum Aenean nesciret fama perennis,
Docta Maroneo caneret nisi pagina uersu!
Haec dedit, ut pereant, ipsum si dicere fas est!
"Sed legum est seruanda fides; suprema uoluntas
Quod mandat fierique iubet, parere necesse est."
20
Frangatur potius legum reuerenda potestas,
Quam tot congestos noctesque diesque labores
Auferat una dies, supremaque uerba parentis
Amittant uigilasse suum. si forte supremum
Errauit iam morte piger, si lingua locuta est
25
Nescio quid titubante animo, non sponte sed altis
Expugnata malis odio languoris iniqui,
Si mens caeca fuit: iterum sentire ruinas
Troia suas, iterum cogetur reddere †uoces?
Ardebit miserae narratrix fama Creusae?
30
Sentiet appositos Cumana Sibylla uapores?
Vretur Tyriae post funera uulnus Elissae
Et iurata mori, ne cingula reddat, Amazon?
Tam sacrum soluetur opus? tot bella, tot enses
In cineres dabit hora nocens et perfidus error?
35
Huc huc, Pierides, date flumina cuncta, sorores;
Exspirent ignes, uiuat Maro ductus ubique
Ingratusque sui studiorumque inuidus orbi
Et factus post fata nocens. quod iusserat ille
Si uetuisse meum satis est post tempora uitae,
40
Immo sit aeternum tota resonante Camena
Carmen, et in populo diui sub numine nomen
Laudetur uigeat placeat relegatur ametur!