Heu misera in nimios hominum petulantia census!

      Caecus inutilium quo ruit ardor opum,

Auri dira fames et non expleta libido,

      Ferali pretio uendat ut omne nefas!

5

Sic latebras Eriphyla uiri patefecit, ubi aurum

      Accepit, turpis materiam sceleris;

Sic quondam Acrisiae in gremium per claustra puellae

      Corruptore auro fluxit adulterium.

O quam mendose uotum insaturabile habendi

10

      Inbuit infami pectora nostra malo!

Quamlibet inmenso diues uigil incubet auro,

      Aestuat augendae dira cupido rei.

Heu mala paupertas numquam locupletis auari:

      Dum struere inmodice quod tenet optat, eget.

15

Quis metus hic legum quaeue est reuerentia ueri,

      Crescenti nummo si mage cura subest?

Cognatorum animas promptum est fratrumque cruorem

      Fundier: affectus uincit auara fames.

Diuitis est, semper fragiles male quaerere gazas:

20

      Nulla huic in lucro cura pudoris erit.

Istud templorum damno excidioque requirit;

      Hoc caelo iubeas ut petat: inde petet.

Mirum ni pulcras artes Romana iuuentus

      Discat et egregio sudet in eloquio,

25

Vt post iurisonae famosa stipendia linguae

      Barbaricae ingeniis anteferantur opes?

At qui sunt, quos propter honestum rumpere foedus

      Audeat inlicite pallida auaritia?

Romani sermonis egent ridendaque uerba

30

      Frangit ad horrificos turbida lingua sonos.

Sed tamen ex cultu adpetitur spes grata nepotum?

      Saltem istud nostri forsan honoris habent?

Ambusti torris species exesaque saeclo

      †Abtantur priscis corpora de tumulis!

35

Perplexi crines, frons improba, tempora pressa,

      Extantes malae deficiente gena,

Simataeque iacent pando sinuamine nares,

      Territat os nudum caesaque labra tument.

Defossum in uentrem propulso pondere tergum

40

      Frangitur et uacuo crure tument genua.

Discolor in manibus species, ac turpius illud,

      Quod cutis obscure pallet in inuidiam.