144 (= 637 R) [EVPH.] IVLIANVS
Sirenes uarios cantus, Acheloia proles,
Et solitae miros ore ciere modos
(Illarum uoces, illarum Musa mouebat
Omnia quae thymele carmina dulcis habet:
5
Quod tuba, quod litui, quod cornua rauca queruntur,
Quodque foraminibus tibia mille sonat,
Quod leues calami, quod suauis cantat aedon,
Quod lyra, quod citharae, quod moribundus olor)
Inlectos nautas dulci modulamine uocum
10
Mergebant auidae fluctibus Ioniis.
Sanguine Sisyphio generatus uenit Vlixes
Et tutos solita praestitit arte suos.
Inleuit cera sociorum callidus aures
Atque suas uinclis praebuit ipse manus.
15
Transiluit scopulos et inhospita litora classis:
Illae praecipites desiluere freto.
Sic blandas uoces nocituraque carmina uicit,
Sic tandem exitio monstra canora dedit.
[EVPH.]
EVPHORBII Riese²