anthologia Latina 636

Testo base di riferimento: A. Friedrich, 2002

Cura dell'edizione digitale: M. Caputo, 2015

Altre sezioni


143 (= 636 R [VOMAN.]) EVPHORBIVS

 

De interno liuore

 

Liuor, tabificum malis uenenum,

Intactis uorat ossibus medullas

Et totum bibit artubus cruorem.

Quo quisquis furit inuidetque forti,

5

Vt debet, sibi poena semper ipse est.

Testatur gemitu graues dolores,

Suspirat fremit incutitque dentes;

Sudat frigidus, intuens quod odit.

Effundit mala lingua uirus atrum,

10

Pallor terribilis genas colorat,

Infelix macies renudat ossa.

Non lux, non cibus est suauis illi;

Non potus iuuat aut sapor Lyaei,

Nec si pocula Iuppiter propinet

15

Atque haec porrigat et ministret Hebe

Aut tradat Catamitus ipse nectar.

Non somnum capit aut quiescit umquam:

Torquet uiscera carnifex cruentus.

Vesanos tacite mouet furores

20

Intentans animo faces Erinys;

Est ales Tityi, ille uultur intus,

Qui semper lacerat comestque mentem.

Viuit pectore sub dolente uulnus,

Quod Chironia nec manus leuarit

25

Nec Phoebus subolesue clara Phoebi.

[VOMAN.])

VOMANII Riese²