Adeste Musae maximi proles Iouis,
Laudem feracis praedicemus hortuli.
Hortus salubres corpori praebet cibos
Variosque fructus saepe cultori refert:
5
Holus suaue, multiplex herbae genus,
Vuas nitentes atque fetus arborum.
Non defit hortis et uoluptas maxima
Multisque mixta commodis iucunditas:
Aquae strepentis uitreus lambit liquor
10
Sulcoque ductus irrigat riuus sata.
Flores nitescunt discolore germine
Pinguntque terram gemmeis honoribus.
Apes susurro murmurant gratae leui,
Cum summa florum uel nouos rores legunt.
15
Fecunda uitis coniuges ulmos grauat
Textasue inumbrat pampinis harundines.
Opaca praebent arbores umbracula
Prohibentque densis feruidum solem comis.
Aues canorae garrulos fundunt sonos
20
Et semper aures cantibus mulcent suis.
Oblectat hortus, auocat pascit tenet,
Animoque maesto demit angores graues;
Membris uigorem reddit et uisus capit.
Refert labori pleniorem gratiam,
25
Tribuit colenti multiforme gaudium.
ASM
ASMENII Riese²