Pieridum columen, cuius Parnasia magno
Numine templa sonant, Phoebe, precor, huc age, laeto,
Tecum †cuncta choro; penetralia sancta sororum
Et noua Castalios latices per rura petentem
5
Hippocrenaeon uictorem sistere fontum
Me fac. namque tuam non nunc nouus aduena turbam
Ingredior, laurusque gerens et florea sertis
Tempora uincta tuis, doctorum munera uatum,
Testor adhuc ueteres quamuis desuetus honores.
10
Alcides mihi carmen erit, non uana Tonantis
Progenies, dignus credi post uiscera numen,
Cuique per inmensos inuicti roboris aestus
Nec nasci potuisse uacat. nam lucis in ipsis,
Inclite, primitiis tardo uix editus ortu
15
Fecisti de patre fidem. sed cur mihi lentis
Ludis adhuc, Cirrhaee, modis tenerumque resultans
Luxuriante leues impellis pollice chordas?
Pone habitum, quo molle canis, et frondis amatae
Linque nemus, mollique exutus tempora lauro
20
Populea mecum carmen luctare sub umbra.
Iam graue plus etiam, quam uentris tempora uellent,
Alcmenam tendebat onus. sed regia Iuno
Impedit et partus prohibet nascique uetabat,
Vt meus ipse deum monstret. nec uiuida caeli
25
Semina mortales norunt sentire latebras,
Nec possunt sufferre moras. datur inde nouercae
Materies, grauibusque odiis augmenta ministrat,
Quod uinci coepisse pudet. Mox inproba binos
In tua membra iubet, dum nasceris, ire dracones.
30
Incumbunt celeres illi, squamosaque iussus
Armat colla furor, nec, quamuis maxima tractu,
Tardata spiris sequitur pars cetera pectus.
Tristis Tartarea uibratur sibilus aura.
Morte rubent oculi trifidisque horrentia linguis
35
Ora sonant nigrumque fremens leuat ira uenenum.
Quid nunc inuictis fraudes innectere fatis,
Caelicolum regina, iuuat? cur obicis angues?
Cur paruo geminos? anne unum posse necari
Iam strato Pythone times? licet omnia mundi
40
Monstra uoces ipsamque armes serpentibus hydram,
Defendet natura deum patremque probabit
(Quod non uis constare) Iouem. Iamque inrita taetri
Iussa parant implere angues, miseroque furore
In sua fata tument. cernit tua membra petentes
45
Horrescitque parens numenque ignara creasse
Mortali pietate timet. nil, sancta, superbae
Paelicis insidias, caelo modo freta, tremescas,
Neue haec monstra tibi faciant, Alcmena, pauorem!
Sic mater potes esse dei. Iam tolle serenum
50
Laeta animum tantoque libens haec aspice uultu,
Vt deceat genuisse Iouem. depone pauorem
Indignum partu, natumque exemplar habeto.
Cui metuis, nihil ipse timet. nam numine recto
Ridebas tu, diue, truces, animosque superbos
55
De genitore tenes, uotisque aptissimus orbis
Gaudebas tantum iam tum meruisse nouercam.
Corripis exiguis mox grandia guttura palmis,
Et manibus teneris cogens in brachia pondus
Constringis pressos, releuans tellure, dracones.
60
Efferat aetherium, quantum uolet, orbis in axem
Latoidas uerosque probet sua fabula diuos,
Quod Delo iam stare licet: non aequa laborum
Gloria, nec parili serpentes sorte necarunt:
Illi unum ferro, geminos et inermis et unus!
65
His coeptis non ulla parat cunabula partus,
Diue, tibi; sed cum totis iam bruma rigeret
Imbribus et solidis haererent flumina lymphis,
Nudum praegelidis durando firmat in undis.
Vtque rudes primo temptasti robore gressus,
70
Frondosae deserta uagus penetralia siluae
Secura iam matre petis telisque tremendis
Ludis et aerias adducto deicis arcu
Aut funda uiolentus aues noctemque sub astris
Exigis et puram fractis bibis amnibus undam.
75
Immanem interea Nemeae per lustra leonem
Ipsa Chimaeraea cretum de gente nouerca
In tua depastis armabat uota iuuencis
Augebatque fero uires rabiemque iuuabat,
Naturam minus esse putans. <Heu> quanta uirorum
80
Funera! quam multos strauit cum gentibus agros!
Non illum magnae uiduatis moenibus urbes
Armorum fregere minis, Martique domando
Adsuetas morsu fudit grauiore cateruas.
Hunc grauis Eurystheus - nam te, quo cuncta leuares,
85
Imperium duri uoluit sufferre tyranni
Sic mundo Fortuna fauens - hunc sternere leto
Imperat. at nullum uirtus reticenda per aeuum
Dignaque sidereos post membra intrare recessus
Posse mori quam uile putat! namque impiger ultro
90
Vadis <et> inmensae scrutatus deuia siluae
In noua sanguineos armantem uulnera rictus
Admonita feritate †iubas uisuque cruentus
Excussis mouet arma toris dubiumque residens
Infremit. inuadis trepidum solisque lacertis
95
Grandia corripiens eluso guttura morsu
Inbellem fractis prosternis faucibus hostem.
Quin et flauicomis radiantia tergora uillis
Ceu spolium fuso uictor rapis, emicat omnis
In laudes mox turba tuas longoque relicta
100
Currit in arua metu. iuuat ire et libera rura
Defensosque uidere locos siluamque iuuencis
Iam facilem et nullis resonantes fletibus agros.
Maenalium petis inde nemus fletamque colonis
Arcadiam et raro steriles iam robore siluas.
105
Namque hic immensa membrorum mole cruentus
Indomitus regnabat aper soloque tremendus
Corpore lunatis fundebat dentibus ornos
Sternebatque suis lugentia rura colonis
Horrebant rigidis nigrantia corpora saetis
110
Duratosque armos scopulis totosque per artus
Difficilis potuisse mori. non spicula in illum
Nodosumue rapis grauato pondere robur:
Armati uiduatur honos; nec uulnera uirtus
Exemplo tibi facta timet. iamque arripis ultro
115
Spumantem, cogisque diem sufferre tuendo,
Atque supinando mirantem lumina uinci
Argolici uictor portas sub tecta tyranni.
Fama celer toto uictorem sparserat orbe,
Auxiliumque dei poscebat Creta cruento
120
Victa malo. Taurus medio nam sidere lunae
Progenitus Dictaea Iouis possederat arua.
Fulmen ab ore uenit, flammisque furentibus ardet
Spiritus; et terram non caeli flamma perurit,
Sed flatus monstri. dextro iam Siria cessent
125
Sidere, solque licet, glaciali frigore uictus,
Abstrusum mundo claudat iubar, aurea condens
Lumina, et ignifluo stupefactus in orbe tepescat:
Aestus habet Cretam, pereunt siluaeque lacusque
Graminaque et fontes sacri, montesque perurit
130
Flamma ferox; Idam superis spectantibus ignis
Dissipat et magno cunabula grata Tonanti
Igne suo monstrum, si fas est dicere, uincit.
Tandem fama celer Dictaea ad litora magnum
Duxerat Alciden, cum taurum dira minantem
135
Accipit et saeuum cornu flammasque uomentem
Corripit atque artus constringens fortibus ulnis
Ignifluos flatus animamque in pectore clausit.