Hic Iani mensis sacer est (en aspice ut aris
Tura micent, sumant ut pia iura Lares),
Annorum saeclique caput, natalis honorum,
Purpureos fastis qui numerat proceres.
5
At quem caeruleus nodo constringit amictus
Quique paludicolam prendere gaudet auem,
Daedala quem iactu pluuio circumuenit Iris,
Romuleo ritu Februa mensis habet.
Cinctum pelle lupae promptum est cognoscere mensem:
10
Mars olli nomen, Mars dedit exuuias.
Tempus uer<num> aedus petulans et garrula hirundo
Indicat et sinus lactis et herba uirens.
Contectam myrto Venerem ueneratur Aprilis:
Lumen ueris habet, quo nitet alma Thetis.
15
Cereus et dextra flammas diffundit odoras,
Balsama nec desunt, quis redolet Paphie.
Cunctas ueris opes et picta rosaria gemmis
Liniger in calathis, aspice, Maius habet,
Mensis Atlantigenae dictus cognomine Maiae,
20
Quem merito multum diligit Vranie.
Nudus membra dehinc solares respicit horas
Iunius ac Phoebum flectere monstrat iter.
Lampas maturas Cereris designat aristas
Floralisque fugas lilia fusa docent.
25
Ecce coloratos ostentat Iulius artus,
Crines cui rutilos spicea serta ligat.
Morus sanguineos praebet grauidata racemos,
Quae medio Cancri sidere laeta uiret.
Fontanos latices et lucida pocula uitro
30
Cerne ut demerso torridus ore bibat
Aeterno regni signatus nomine mensis,
Latona genitam quo perhibent Hecaten.
Turgentes acinos uarias et praesecat uuas
September, sub quo mitia poma iacent,
35
Captiuam filo gaudens religasse lacertam,
Quae suspensa manu mobile ludit opus.
Dat prensum leporem cumque ipso palmite fetus
October; pinguis dat tibi ruris aues.
Iam Bromios spumare lacus et musta sonare
40
Apparet: uino uas calet ecce nouo.
Carbaseos post hunc artus indutus amictus
Memphidos antiquae sacra deamque colit,
A quo uix auidus sistro compescitur anser
Deuotusque satis incola Memphideis.
45
Annua sulcatae †coniecti semina terrae
Pascit hiems; Pluuio de Ioue cuncta madent.
Aurea nunc reuocet Saturno festa December:
Nunc tibi cum domino ludere, uerna, licet.