anthologia Latina 14

Testo base di riferimento: A. Riese, 1894

Cura dell'edizione digitale: F. Ragni, 2009

Altre sezioni


Europa

Vulneris inpatiens hominum rerumque repertor

Et faciem tauro propior descendit ad undas.

Europam niuei solatur amore iuuenci.

Dulcibus illa quidem inlecebris in litore sicco

5

Luserat, insignis facie, candore niuali.

Saucius at quadrupes saltus ingressus apertos

Forte fuit iuxta, superi regnator Olympi,

Obtulerat qui se ignotum uenientibus ultro

Virginibus Tyriis aurata fronte iuuencum.

10

At circum late comites per litora passim

Diffugiunt uisu exsangues taurumque relinquunt,

Sola (nouum dictu) contra stetit ora iuuenci

Ante Iouem: nam te uoluit rex magnus Olympi.

Hunc Phoenissa tenet uasta se mole mouentem

15

Purpureosque iacit flores omnemque pererrat,

Ille autem spissa iacuit reuolutus harena.

Inponit regina manum patiensque pericli

Mollibus intexens ornabat cornua sertis.

Hunc ubi contiguum summo tenus attigit ore

20

Et super incumbens sertis et fronde coronat -

Iam iam nulla mora est - animum labefactus amore

Accepit uenientem ac mollibus extulit undis.

Illi (sensit enim tuus, o clarissime, frater)

Subsidunt undae, strauerunt aequora uenti.

25

Nunc pelagi nymphae crinem de more solutae

Suspensum et pariter comitique onerique timentem

..............................

Egregia interea summa sublimis ab unda

Prona petit maria et pelago decurrit aperto.

Tunc laeua taurum cornu tenet inscia culpae

30

Obliquatque sinus in uentum auramque patentem:

Ille, manum patiens, miro properabat amore,

Et ductus cornu rex omnipotentis Olympi

Insuetum per iter tacitis subremigat undis

Perfidus, alta petens abducta uirgine praedo.

in mg. dextr. B. I 14. M. 575. B. IV 207  indicau. Riese