hymni Christiani anonymi 113

Altre sezioni


Aeterne rex altissime,

Redemptor et fidelium,

Quo mors soluta deperit,

Datur triumphus gratiae;

5

Scandens tribunal dexterae

Patris, potestas omnium

Conlata est Iesu caelitus,

Quae non erat humanitus,

Vt trina rerum machina

10

Caelestium terrestrium

Et infernorum condita

Flectat genu iam subdita.

Tremunt uidentes angeli

Versam uicem mortalium,

15

Culpat caro, purgat caro,

Regnat Deus Dei caro.

Tu, Christe, nostrum gaudium

Manens Olympo praeditum,

Mundi regis qui fabricam

20

Mundana uincens gaudia.

Hinc te precantes quaesumus,

Ignosce culpis omnibus,

Et corda sursum subleua

Ad te superna gratia;

25

Vt cum repente coeperis

Clarere nube iudicis,

Poenas repellas debitas,

Reddas coronas perditas.