hymni Christiani anonymi 104

Altre sezioni


Magnum salutis gaudium!

Laetetur omne saeculum!

Iesus redemptor omnium

Sanauit orbem languidum.

5

Sex ante paschae ferias

Aduenit in Bethaniam,

Vbi pie post triduum

Resuscitauit Lazarum.

Nardi Maria pistici

10

Sumpsit libram mox optimi,

Vnxit beatos Domini

Pedes rigando lacrimis.

Post haec iugalis asinae

Iesus, supernus arbiter,

15

Pullo sedebat, inclitam

Pergebat Ierosolymam.

O quam stupenda pietas!

Mira Dei clementia!

Sessor aselli fieri

20

Dignatur auctor saeculi.

Olim propheta praescius

Praedixit almo Spiritu:

"Exulta" dicens "filia

Sion satis et iubila.

25

Rex ecce tuus humilis,

(Noli timere), ueniet,

Pullo iugalis residens,

Tibi benignus, patiens."

Ramos uirentes sumpserat

30

Palma recisos tenera

Turba, processit obuiam

Regi perenni plurima.

Coetus sequens et praeuius

Sanctoque plenus Spiritu

35

Clamabat "in altissimis

Hosanna Dauid filio."

Quidam solutis stropheis

Viam tegebant uestibus,

Pluresque flore candido

40

Iter parabant Domino.

Ad cuius omnis ciuitas

Commota ingressum tremuit,

Hebraea proles aurea

Laudes ferebat debitas.

45

Nos ergo tanto iudici

Curramus omnes obuiam;

Palmas gerentes gloriae

Mente canamus sobria