hymni Christiani anonymi 90

Altre sezioni


Iesus refulsit omnium

Pius redemptor gentium;

Totum genus fidelium

Laudes celebret dramatum.

5

Quem stella natum fulgida

Monstrat micans in aethera,

Magosque duxit praeuia

Ipsius ad cunabula.

Illi cadentes paruulum

10

Pannis adorant obsitum,

Verum fatentur et Deum

Munus ferendo mysticum.

Denum ter annorum cyclis

Iam parte uiuens corporis

15

Lympham petit baptismatis

Cunctis carens contagiis.

Felix Iohannes mergere

Illum tremescit flumine,

Potens suo qui sanguine

20

Peccata cosmi tergere.

Vox ergo prolem de polis

Testatur excelsi Patris,

Virtus adestque Pneumatis

Sancti datrix charismatis.

25

Nos, Christe, supplici prece

Precamur, omnes protege,

Qui praecipis rubescere

Potenter hydrias aquae.

Praesta benignum sedulo

30

Solamen adiutorio,

Raptosque nos a tartaro

Regnare fac tecum polo.