hymni Christiani anonymi 84

Altre sezioni


Conditor alme siderum,

Aeterna lux credentium,

Christe redemptor omnium,

Exaudi preces supplicum;

5

Qui, condolens interitu

Mortis perire saeculum,

Saluasti mundum languidum,

Donans reis remedium,

Vergente mundi uespere,

10

Vti sponsus de thalamo,

Egressus honestissima

Virginis matris clausula.

Cuius forti potentiae

Genu curuantur omnia

15

Caelestia, terrestria,

Nutu fatentur subdita,

Occasum sol custodiens,

Luna pallorem retinens,

Candor in astris relucens

20

Certos obseruans limites.

Te deprecamur, hagie,

Venture iudex saeculi,

Conserua nos in tempore

Hostis a telo perfidi.

25

Laus, honor, uirtus, gloria

Deo Patri cum Filio

Sancto simul Paraclito

In sempiterna saecula.