hymni Christiani anonymi 49

Altre sezioni


Christe, caeli Domine,

Mundi saluator maxime,

Qui nos crucis munere

Mortis soluisti legibus,

5

Te nunc orantes poscimus,

Tua conserues munera,

Quae per legem catholicam

Cunctis donasti gentibus.

Tu uerbum Patris aeterni

10

Ore diuino editus,

Deus ex Deo subsistens,

Vnigenitus Filius.

Te uniuersa creatura

Mundi fatetur dominum,

15

Iussu Patris inchoata,

Tuis perfecta uiribus.

Tibi omnes angeli

Caelestem praestant gloriam,

Te chorus archangelorum

20

Diuinis laudant uocibus.

Te multitudo seniorum,

Bis duodenus numerus,

Odoribus plenas gestans

Supplex adorat pateras.

25

Tibi cherubin et seraphin

Throno paterni luminis

Senis alarum plausibus

Clamore iugi personant.

Sanctus, sanctus, sanctus,

30

Dominus Deus sabaoth;

Omne caelum atque terra

Tua sunt plena gloria.

Hosanna filius Dauid!

Benedictus es a Patre,

35

Qui in nomine Domini

Venisti ex celsis Deus.

Tu agnus inmaculatus

Datus es terrae uictima,

Qui sanctorum uestimenta

40

Tuo lauisti sanguine.

Te multitudo beatorum

Caelo locata martyrum,

Palmis insignis, coronis,

Ducem sectantur gloriae:

45

Quorum nos addas numero,

Te deprecamur, Domine;

Vna uoce te sonamus,

Vno laudamus carmine.