Rex aeterne Domine,
Rerum creator omnium
Qui es ante saecula
Semper cum Patre Filius;
5
Qui mundi in primordio
Adam plasmasti hominem,
Cui tuae imaginis
Vultum dedisti similem;
Quem diabolus deceperat,
10
Hostis humani generis,
Cuius tu formam corporis
Adsumere dignatus es,
Vt hominem redimeres,
Quem ante iam plasmaueras,
15
Et nos Deo coniungeres
Per carnis contubernium.
Quem editum ex uirgine
Pauescit omnis anima,
Per quem nos resurgere
20
Deuota mente credimus.
Qui nobis per baptismata
Donasti indulgentiam,
Qui tenebamur uinculis
Ligati conscientiae.
25
Qui crucem propter hominem
Suscipere dignatus es,
Dedisti tuum sanguinem
Nostrae salutis pretium.
Nam uelum templi scissum est
30
Et omnis terra tremuit,
Tu multos dormientium
Resuscitasti, Domine.
Tu hostis antiqui uires
Per crucem mortis conterens,
35
Qua nos signati frontibus
Vexillum fidei ferimus.
Tu illum a nobis semper
Repellere dignaueris,
Ne umquam possit laedere
40
Redemptos tuo sanguine.
Qui propter nos ad inferos
Descendere dignatus es,
Vt mortis debitoribus
Vitae donares munera.
45
Tibi nocturno tempore
Hymnum deflentes canimus,
Ignosce nobis, Domine,
Ignosce confitentibus.
Quia tu testis et iudex es,
50
Quem nemo potest fallere,
Secreta conscientiae
Nostrae uidens uestigia.
Tu qui nostrorum pectorum
Solus inuestigator es,
55
Tu uulnerum latentium
Bonus adsistis medicus.
Tu es qui certo tempore
Daturus finem saeculi,
Tu pro cunctorum meritis
60
Iustus remunerator es.
Te ergo, sancte, quaesumus,
Vt nostra cures uulnera,
Qui es cum Patre Filius
Semper cum sancto Spiritu.