Eugenius Toletanus carminum appendix 20

Altre sezioni


Oremus pariter toto de corde rogantes,

Vt tibi praesidio caelestia porrigat arma

Arbiter omnipotens, ut possis fortiter hostes

Debacchare tuos ferri de cuspide fossos

5

Et ualeas regum multorum frangere colla,

Qui dominum uerum nolunt cognoscere Christum,

Qui deus est unus uere cum patre colendus,

Quem superus totus cognoscit et infimus ordo,

Quem chorus angelicus collaudans semper adorat,

10

Et genitum patris totum diffusa per orbem

Ecclesia Christum cognoscit et omnipotentem;

Qui mare tellurem caelum, qui cuncta creauit,

Quae mundus totus per totum continet iste.

Qui posuit celso lucentia sidera caelo

15

Et roseis totum colorauit floribus orbem,

Sideribus uariis superum depinxit olympum,

Muneribus sacris mundum ditauit et imum;

Qui concessit aquis geminos producere fructus

Et diuersa locis diuersis ponere sanxit,

20

Scilicet altilium sursum laticumque deorsum,

Vt plebs pinniuola caeli concrescat in auris

Et squamosa sali fluidis concrescat in undis:

Illa poli uolitans siccas transuerberet auras,

Ista maris bibulas natans transcurrat arenas.

25

Cuius ad imperium rutilans allampadat ignis,

Et tremulas mittunt timida tonitrua uoces,

Nebula discurrens properat dispergere nimbos,

Grandinis ut fractos iaculet de uentre lapillos;

Arcus in excelso seruato foedere durat,

30

Ne cataclysmus aquae terrarum germina perdat,

Tendit et igniferos mundi per compita crines

Sol nimium rutilus, pulcherrimus atque coruscus,

Impleat ut totum proprio de lumine mundum.

Plura quid enumerem? Christo parere potenti

35

Omnis festinant, quae nunc per saecula durant.