Sanctorum meritis claro semperque beato
Hesychio Eugenius uilis et exiguus.
Accipe conscriptos plebeio carmine uersus,
Quos dat, dilecte, pagina maesta tibi.
5
Cara mihi uestros aduexit epistola questus
Et me tristifico perculit inde sono.
Oblitum te namque gemis uilescere nobis
Inque meo uultum corde perisse tuum.
Crede meis uerbis, nam fas est credere nobis;
10
Credere nempe licet, cum dubitare nocet.
Testor namque deum, sanctorum nomina testor
Affectum uestri non tepuisse mihi.
Ante polus solis ac lunae luce carebit
Quam sim conspectus immemor ipse tui.
15
Ante quoque nostro discedet pectore uita
Quam uestrae mentis dulcis amicitia.
Voluent puncta dies, uoluentur mensibus anni:
Semper in ore meo nomen amorque tuus.
En quia deprompsit affectum pagina nostrum,
20
Dilige me nimium, dilige me nimium.
Obsequio cordis persoluens iura salutis
Hinc precor ut miseri sis memor, alme, tui.
Christus ubique tuis concedat prospera uotis
Et parcat culpis Christus ubique meis.