Eugenius Toletanus carmina 9

Other sections


Incolit hoc templum sat felix turba piorum,

      Quorum promeruit sors benedicta polum.

Hic morte sacros, uirtutum culmine celsos

      Vnica ter senos continet urna uiros.

5

Fumea caenosi liquerunt gaudia mundi

      Proque fide domini membra dedere neci.

Hic etiam compar meritis Encratia martyr

      Sorte sepulcrali dissociata iacet;

Huius inexhaustum testantur sancta triumphum

10

      Palla cruore rubens, secta papilla fibris.

Nomina magnorum si mauis nosse uirorum,

      Edicet cursim subdita summa tibi.

Sed quia cuncta simul metrum non suscipit unum,

      Accipe diuersis haec uariata metris:

15

Quintilianus adest, Euodius atque Cassianus,

Felix, Lupercus Ianuariusque,

Iulius, Vrbanus, Apodemius, inde Primitiuus,

Optatus, Publius, Caecilianus.

Hic Successus inest, hic Matutinus habetur,

20

Ecce Faustus, ecce Fronto postque Martialis.

Haec tibi turba potens concedat prospera, lector,

      Et ueniam praestet haec tibi turba potens.