Eugenius Toletanus carmina 6

Altre sezioni


Qui cupis esse bonus et uis dinoscere uerum,

Vt mortis socium sic mordax effuge uinum.

Nulla febris hominum maior quam uiteus umor

Immodice sumptus: uincit letale uenenum.

5

Sontior est igne, uiroso sontior angue.

Quantum uina nocent, non tantum uipera laedit.

Inde tremor membris, inde est obliuio mentis

Et gressus poplite nutans et uisio fallax.

Surdescunt aures, balbuttit denique lingua,

10

Perdens eloquium profundit semilatratum.

Dic mihi, dic, ebrie, uiuis an morte grauaris?

Pallidus ecce iaces, ecce sine mente quiescis;

Aegra quies oculos letali pondere clausit;

Non bona, non mala, non dura, non mollia sentis.

15

Hoc tantum distas a fati sorte sepulto,

Quod tenuis miseros suppungit anhelitus artus.