Eugenius Toletanus carmina 1

Altre sezioni


Rex deus immense, quo constat machina mundi,

Quod miser Eugenius posco, tu perfice clemens:

Sit mihi recta fides et falsis obuia sectis,

Sit mihi praecipue morum correctio praesens,

5

Sim carus, humilis uerax, cum tempore prudens,

Secreti tacitus et linguae famine cautus.

Da fidum socium, da fixum semper amicum,

Da blandum sobrium parcum castumque ministrum.

Non me pauperies cruciet aut langor obuncet.

10

Sit comes alma salus et sufficientia uictus.

Absint diuitiae fastus et iurgia litis,

Inuidia luxus et uentris pensio turpis.

Crimine nec laedam quemquam nec crimine laedar.

Sic bene uelle queam, quo prauum posse recedat.

15

Nil turpe cupiam, faciam uel proloquar umquam.

Te mens desideret, lingua canat, actio promat.

Da, pater altitonans, undosum fletibus imbrem,

Quo ualeam lacrimis culparum soluere moles;

Da precor auxilium, possim quo uincere mundum,

20

Et uitae stadium placido percurrere passu.

Cumque suprema dies mortis patefecerit urnam,

Concede ueniam, cui tollit culpa coronam.