pseudo Isidorus de fabrica mundi


Creator mundi <diuinus> in suo condidit uerbo,

Quod celum et terra quod gestat equoris unda;

Extendit celos sursum cum suis nubibus altis,

Fundauit terram deorsum cum suis montibus magnis,

5

Suspendit aquas in celo cum suis imbribus almis.

Expandit maria per orbem cum suis bracchiis cunctis,

Eduxit flatus uentorum de suis thesauris sacris

Et inspirare coegit mouendis fluctibus maris;

Aquarum fecit abissos cum suis fontibus iugis,

10

Librauit mole terrarum cum suis rupibus altis,

Emisit flumina magna de suis fontibus orta.

Solis ortum excitauit, lune recondidit ignem

Commune luce lustrantem alternis uicibus orbem;

Astrorum condidit choros meantes celi per axem,

15

Produxit floridam lucem ignibus crebris micantem.

Maiora sunt illa celi que super astra creauit,

Formauit angelos omnes, tronos excelsos locauit,

Virtutes celi digessit, et cuncta magna peregit.

Inferni tartara seui, digesta horrore penarum,

20

Cum suis flammis eternis diabulo preparauit;

Mercedem tribuens cunctis promittit premia iustis

........................ et penam cunctis iniquis.

Montes ornauit feris, silbarum densa creauit,

Formauit pecudum genus et genus omne draconum

25

Ceruleosque serpentes auri fulgore micantes;

Diffusit campos uirentes tumentes extulit colles

Quos et uestiuit liliis et uiolis pretiosis

....................... et uario germine flores;

Exinde fruimur omnes rosarum gratos odores,

30

Exinde teximus sertas capiti nostro coronas.

Volucres pinnis instruxit, plume colore distinxit,

Alarum plausu uolare librato pondere iussit,

Ac dedit ore loquaces diuersas fundere uoces,

Et cantus edere dulces.

35

Ingentes condidit cetos, impleuit piscibus equor,

Contexta membra squamis .......................

Remigiisque pinnarum armauit; meantes semitas maris,

Natantes sinus in unda per cuncta litora currunt.

Hominem inde creauit, spiritum membris infundit,

40

Euulsit lateris costam, exinde feminam finxit,

Ostendit duas personas ex uno sanguine sumptas.

Talibus ille deus impleuit copiis mundum,

Ornatum reddidit orbem diuerso cultu florentem:

Et postquam cuncta peregit creator ipse quieuit.