carmen de nominibus litterarum uersus

Altre sezioni


Principium uocis ueterumque inuentio prima,

Nomen habens domini sum felix uoce pelasga;

Exsecrantis item dira interiectio dicor.

Principium libri, mutis caput alter et ordo,

5

Tertia felicis uere sum syllaba semper;

Si me Graece legas, uiridi tum nascor in horto.

Principium caeli, primis et luna figuris;

Et me clerus amat, legeres si Graece, Latinus;

Littera sum terrae pedibus perscripta quaternis.

10

Ablati casus mox sum et pars septima linguae

Omnipotentis habens nomen, "us" bannita iuncta;

Sum medium mille, et ueterum mala nota deorum.

Pars ego mutarum, uere uocalis habebor

Altera deceptae quondam sum syllaba matris

15

Pars quoque sum plena, et uocis pars quinta Latinae.

Semisonus dicor liquidis ut muta ministro;

Nescio quid causae est cur me sic Hebraeus odit;

Nox perit et tenebrae, si me de flumine tollas.

Si solam legeres, tunc clarus caesar habebor;

20

Si duplicem legeres, romanus praesul habebor;

Post me quinta sonat paruum uocalis in ore.

Nomen habens uacuum, fragilem deporto figuram;

Non nisi per uersus in me manet ulla potestas;

Hoc tantum ualui: linguis spiramina ferre.

25

Sum numerus primus; iuuenum contentio magna;

Spreta figura mihi est etiam, sed mira potestas;

Me tamen haud dominus uoluit de lege perire.

Dux ego per primos prime, uocalis habebar,

Meque meo penitus pepulerunt iure moderni

30

Nunc caput afrorum merui uel mensis habere.

Si me Graece legas totum sine sorde uidebis;

Nec frustra quoniam per carmina saepe liquesco

Sed tamen agricola in curuo me uertice portat.

In metris iugiter cum sim uocalibus esca

35

Suadeo de musis tollas me non genitrice,

Ne atra figura tuos tenebris offuscet ocellos.

Vox sum certa sonans, qua res monstratur adesse;

Tollere me multi quaerunt de nomine frustra;

Vim quoque sic solitam pitheo de carmine perdens.

40

Littera saepe choris en sum signata canentum;

Curro uias multas, manibus sed fixa manebo,

Perque meam formam saeclorum uertitur ordo.

Me sine nulla potest hominum concordia cerni;

Nota potentis eram plebis perscripta columnis,

45

Sic quoque nota fui patrum, bis scripta, piorum.

Sola mihi uirtus uocalem uincere quintam,

Qua sine non nascor ego; hanc occido nefande,

Quapropter iuste memet respuere moderni.

Est nomen durum, sed uirtus durior illo:

50

Idcirco placuit me nam molliri camenis;

Nota tamen fueram populi uincentis et orbem.

Nota fui patrum; propriae et uirtutis in odis;

Sed modo iam melius domini sum nota secunda

Et me phoebus amat, posuitque in origine lucis.

55

Angelus en uoluit poni me in fronte gementum,

Cetera turba neci miserae dum tota dabatur;

Te precor, haec legitans, proprio me nomine signa.

Forma manet semper, uirtus mihi sed uariatur:

Vtraque sum uere nullo discrimine formae;

60

Nec me Graecus habet scriptam, sed me duo complent.

Forma mihi simplex, sed certe dupla potestas;

Aere me puro perscribit penna uolantis;

Per me saepe patet numerus de lege sacratus.

Nomine sum duplex, sed graeco robore simplex;

65

Ac typica in membris tribus, ut Samius bene sensit:

Infima dans pueris, at dextra ac laeua sapitis.

Littera sum graeca, duplex, sed more liquentum

Deficio currens per carmina sicuti simplex

Saepe etiam sibilans inter dentes morientum.