Clare sacerdos, clues, almo fultus decore,

Tuis, Columba, decus qui redoles in orbe.

Monachorum cohortes te clarum dicent patrem,

Te sofum proceres, te uatem dixere reges.

5

Annent decorata tuis factis praecepta:

Religionis forma praebet nitorem sacra.

Sic uirtutum decus, milis Christi, in euum

Comptus habere, sacro pandens praecepta dictu.

Quid tibi his dignis aequantur in metallis

10

Vel comparantur sanctis seclorum gesta factis?

Non aureum caput Babylona Persarum,

Argenteus Darius Medus habuit priscus

Nec aeneus Macedo olim signauit bello

Vel sepultus salo Nilicola et Cincris.

15

Nihil dignum simile horum gessere gestis

Zmirneus Omerus et Mantuanus Maro,

Non Poenus Hannibal, non pernix Porus Indus,

Non Marius, Catulus, Scipio, Silla, Gracchus;

Non ferreus Caesar, Bucchus Numida, Ambro,

20

Celtiberus, Scita, Hiberus et Sicamber.

Fertilis ut cedrus palmaque poma praebes,

Aetaliae thesaurus tu gratus ut obrizus,

Tu Sabeorum grata turea oles uirga,

Tu balsama sudas uirga Engaddi secta.

25

Tu palmitis opaga manes in uite uera,

Tu oleum et pingues diffundes ut oliua.

Tu lenitate polles, benignitate clares.

Mistica rimando et tecta penetrando

Aedificasti domum petra supra insertam,

30

Quae molem omnem rerum firmauit conditarum.

Quam supra quis positus manet firmus in eua;

Quae lapis angularis, crisofrasus, iacinctus,

Sardonis, zmaracdus, topazius, berillus,

Crisolitus et iaspis, saffirus, ametistus,

35

Calcidon et sardinus, candidus margaritus

Herilis Hierusalem positus fundamento.

Tu mortuus uiuis, dum uitam morte emis;

Tu damnanda perdis, dum carnis damna sentis.

Tu crucianda cares, dum Christi crucem geris;

40

Patriam dum fugis, ad patriam tu redis.

Aeterno socialis regi, dum regis temnis;

Paradysi amoena tu penetras per eua,

Possessurusque laeta uirentia per rura,

Quem Dominus uirtutum coronauit amator,

45

Sedibus aeternis te collocauit suis.

Ibi canes iucunda carmina uoce sacra,

Iam capes tu thesauros, quos dudum recondisti,

Commercio quos pio commutasti in saeclo.

Chorus angelorum cernes et prophetarum,

50

Martyrum candidatus cateruas et iustorum.

Permixtus luci fulua, his clares duce Christo

Receptus tu in castris, hoste sica perempto.

Dominum inuenisti quem hic Iesum quesisti,

Qui tropheum de mundo sic reddit triumphanti.

55

Graderis per uiam, quam olim praeparasti,

Quae ducit ad aeterna gaudia paradysi.

Tu mundum spreuisti, ut Messiam haberes,

Cum quo manes per eua fine sine futura.

Gloria Trinitati semper canenda uirtus

60

Presentia per eua et omnia futura.