Columbanus versus ad Hunaldum


Casibus innumeris decurrunt tempora uitae,

Omnia praetereunt, menses uoluuntur in annis;

Labitur in senium momentis omnibus aetas.

Vt tibi perpetuam liceat conpraendere uitam,

5

Molles inlecebras uitae nunc sperne caducae.

Blanda luxuria uirtus superatur honesta.

Ardet auaritia caecaque cupidine pectus.

Nescit habere modum uanis mens dedita curis.

Vilius argentum est auro, uirtutibus aurum.

10

Summa quies, nil uelle super quam postulat usus.

Hos ego uersiculos misi tibi saepe legendos;

Vt mea dicta tuis admittas auribus, oro.

Ne te decipiat uana et peritura uoluptas.

Aspice, quam breuis est procerum regumque potestas.

15

Lubrica mortalis cito transit gloria uitae.

Da ueniam dictis, fuimus fortasse loquaces.

Omne quod est nimium semper uitare memento.