Flauius hymnus


Tellus ac aethra iubilent

In magni cena principis,

Quae protoplasti pectora

Vitae purgauit ferculo.

5

Hac nocte factor omnium

Potenti sat mysterio

Carnem suam cum sanguine

In escam transfert animae.

A celsis surgens dapibus

10

Praebet formam mortalibus,

Humilitatis gratia

Petri petens uestigia.

Pallet seruus obsequio,

Cum angelorum dominum

15

Ferendo lympham linteo

Cernit caeno procumbere.

"Permitte Simon ablui;

Acta figurant mystica,

Dum summus ima baiulo,

20

Quod cinis seruet cineri."

Lauator toris accubat,

Verbique fauos aggerat,

Quos inter hostem denotat,

Necis dolos qui ruminat.

25

Trux lupe, Iuda pessime,

Fers agno miti basia,

Das membra loris regia

Quae sorde tergunt saecula.

Nexi soluuntur hodie

30

Carnis ac cordis carcere;

Vnguen sacratur chrismatis:

Spes inde crescit miseris.

Victori mortis inclitam

Pangamus laude gloriam,

35

Cum Patre et sancto Spiritu

Qui nos redemit obitu.