Venantius Fortunatus spuriorum appendix 8

Altre sezioni


Quem terra pontus aethera

Colunt adorant praedicant,

Trinam regentem machinam

Claustrum Mariae baiulat.

5

Cui luna, sol et omnia

Deseruiunt per tempora,

Perfusa caeli gratia

Gestant puellae uiscera.

Mirantur ergo saecula

10

Quod angelus fert semina,

Quod aure uirgo concipit

Et corde credens parturit.

Beata mater munere,

Cuius supernus artifex,

15

Mundum pugillo continens,

Ventris sub arca clausus est.

Benedicta caeli nuntio,

Fecunda sancto spiritu,

Desideratus gentibus

20

Cuius per aluum fusus est

O gloriosa domina.

Excelsa super sidera,

Qui te creauit prouide

Lactasti sacro ubere.

25

Quod Eua tristis abstulit

Tu reddis almo germine;

Intrent ut astra flebiles,

Caeli fenestra facta es.

Tu regis alti ianua

30

Et porta lucis fulgida.

Vitam datam per uirginem

Gentes redemptae plaudite.