Si nequeo praesens, absens tibi soluo tributum,
Vt probet affectum, mater amata, meum.
Si non essem absens, facerem quodcumque iuberes:
Obsequiis paruis forte placeret iners;
5
Pectore deuoto set rustica lingua dedisset
Pastoris calamo matris in aure sonum;
Imperiis famulans tererem mea membra diurnis,
Seruirent dominae subdita colla suae;
Nulla recusarent digiti puteoque profundo
10
Quae manus hoc scripsit prompta leuaret aquas,
Protraheret uites et surcula figeret hortis,
Plantaret, coleret dulce libenter holus.
Splendor erat tecum mea membra ardere coquina
Et nigra de puro uasa lauare lacu.
15
Hinc tibi nunc absens Marcelli munera misi
Cui dedit excelsum uita beata locum?
Et si displiceant indigno uerba relatu,
Complaceant animo signa superna tuo.
Sis longaeua mihi cum nata et messe sororum.
20
Virgineoque choro crescat ouile dei.
Si tua uerba dares, essent plus dulcia quam si
Floribus electis mella dedisset apes.