Casibus innumeris hominum momenta rotantur

      Instabilique gradu pendula uita meat.

Ipsa futurarum titubans mens anxia rerum

      Ventura ignorat quid sibi lux pariat.

5

Nam me digressum a uobis Eomundus amator

      Illa suscepit qua bonitate solet.

Hinc citus excurrens Cariacae deuehor aulae;

      Tincillacensi perferor inde loco.

Hinc sacer antistes rapuit me Domitianus,

10

      Ad sancti Albini gaudia festa trahens.

Inde relaxatus, per plura pericula fessum

      Puppe sub exigua fluctus et imber agit,

Quo grauis incumbens Aquilo subuerterat amnem

      Et male curuatos extulit unda sinus;

15

Nec sua commotos capiebant litora fluctus:

      Inuadunt terras aequora fusa nouas.

Pascua rura nemus segetes uiburna salictum

      Viribus iratis una rapina tenet.

Huc mihi commisso per confraga murmura ponti

20

      Flatibus horrificis laxa fremebat hiems

Surgebatque cadens per aquosa cacumina puppis,

      Ascendens liquidas monte uagante uias;

Quo rate suspensa modo nubila nauta tenebat,

      Gurgite subducto rursus ad arua redit.

25

Fluctibus infestis pelagi spumante procella

      Assidue rapidas prora bibebat aquas;

Aequora lambebant inimica pace carinam,

      Tristius amplexu nos nocitura suo.

Sed mora nulla uetat uarias memorare querellas:

30

      Post referenda simul murmura corde tego.

Hoc mihi praecipue diuina potentia praestet,

      Vt cito felices uos reuidere queam.