Munera direxi, sed non mea, crede fatenti:
Ad te quae ueniunt sunt tua dona magis.
Melle superfusas cunctorum porrigis escas,
Cuius ab ore pio dulcia mella fluunt.
5
Copia quanta mihi maneat de munere uestro
Credite, dum spargit iam gula uicta cibos.
Sed mihi da ueniam, uenerando corde benigna:
Quod praesumpsit amor sit ueniale mihi.
Nunc Christum pro me chorus ille uerendus adoret,
10
Ne peccatorem me mea culpa grauet.