Venantius Fortunatus carminum libri 10, 15

Altre sezioni


Felix bis meritis sibi Machabaea uel orbi

      (Nobilitas generis nobilior genitis),

Quae septem palmas caelo transmisit ab aluo,

      Martyriique decus protulit ille uterus.

5

Tu quoque prole potens, recte Armentaria felix,

      Nec minor ex partu quam prior illa suo.

Illa uetus numero maior, tu maxima solo:

      Quod poterant plures, unicus ecce tuus.

Fetu clara tuo, geniti circumdata fructu,

10

      Est tibi Gregorius palma corona decus.

Me Fortunatum humilem commendo uerenter

      Ac mihi caelestem quaeso preceris opem.