Summe pater patriae, dulci mihi nomine Rucco,
Interiora mei cordis amore tenens:
Quidquid amicitiae ueteris collegimus ambo
Crescit in affectum semper, opime, meum.
5
Nam mihi nulla meos obliuio tollit amantes:
Ante sit extremum, quam mihi desit amor.
Vnde, beate pater, properans dependo salutem,
Optans longinquo te superesse gradu.
Hinc etiam genitae reddunt tibi pectore grates
10
Munere pro niueo marmore de Pario:
Quae, quotiens epulae disco tribuuntur in illo,
In doni specie te pietate uident.
Nam pro gemmarum serie tibi reddat honorem
Cui data proficiunt crux ueneranda throno.